Os climas do mundo

Os climas do mundo son moi variados como podemos ver estes días na clase. Na zona cálida distinguimos ata catro tipos climáticos: o clima ecuatorial, o tropical, un subtipo de tropical que é o monzónico, e o desértico. Na zona temperada diferenciamos entre o mediterráneo, oceánico e continental. Na zona fría atopamos o clima polar, e , de carácter azonal o de montaña. O clima ecuatorial desenvólvese a ámbolos dous lados do Ecuador, na Cunca do Amazonas, a Cunca do río Congo e as illas de Indonesia. O clima tropical abarca as zonas que rodean á area ecuatorial ata os límites dos grandes desertos da Terra (Sahara, Kalahari, Australia) exemplos do clima desértico. O clima monzónico é propio das penínsulas do Indostán e de Indochina, as súas precipitacións son elementais para o cultivo do arroz, base da alimentación destas zonas. Entre os climas temperados, o oceánico localízase nas fachadas dos continentes, o mediterráneo a carón deste mar así como algunha pequena franxa do sur de África, Australia e California. O continental é propio do interior dos continentes (Chairas americanas, leste de Europa, Rusia e Siberia). En canto ós climas fríos salientar o polar na zona do Polo Norte e Sur, e o clima de montaña nas cordilleiras e mesetas máis altas da Terra (Himalaia, Tíbet, Altai, Alpes, Andes etc.)
Colaboración de Isabel G. Piñeiro